KICHIK QUVVATLI BIR FAZALI ELEKTR ISTE’MOLCHILARNI SIMISTOR ASOSIDAGI KONTAKTSIZ QURILMALAR YORDAMIDA ISHGA TUSHIRISH

Abstract

Kichik quvvatli elektr iste’molchilarni bir fazali elektr tarmog‘idan samarali va xavfsiz tarzda ta’minlash, ayniqsa ularni kommutatsiyalash jarayonida, ishonchli va zamonaviy texnologiyalarga asoslangan kommutatsiya apparatlaridan foydalanishni talab etadi. An’anaviy rele yoki kontaktorlar asosidagi kommutatsiya qurilmalari uzoq yillardan buyon qo‘llanib kelinayotgan bo‘lsa-da, ular mexanik harakatlanuvchi qismlarga ega bo‘lib, bu esa ularning xizmat muddati va ishonchliligiga salbiy ta’sir ko‘rsatadi. Ushbu maqolada simistor asosida ishlab chiqilgan kontaktsiz kommutatsiyalash qurilmasi haqida batafsil ma’lumotlar keltirilgan. Bunday qurilmalar, ayniqsa, maishiy yoki sanoat tarmoqlarida ishlatiladigan kichik quvvatli nasoslar, isitgichlar va boshqa bir fazali yuklamalarni avtomatlashtirib boshqarishda muhim ahamiyat kasb etadi. Simistor asosidagi kontaktsiz kommutatsiyalash qurilmalari o‘zining ixchamligi, yuqori ishonchliligi, kam energiya sarfi va shovqinsiz ishlashi bilan ajralib turadi. Qurilma tarkibida mexanik kontaktlarning yo‘qligi tufayli u uzoq muddat xizmat qiladi va servis xarajatlarini kamaytiradi. Shu bois, ushbu turdagi qurilmalar kichik quvvatli elektr tizimlarida keng qo‘llanilishi maqsadga muvofiq hisoblanadi.